Onte á mañá, os
membros da cúpula directiva desprazáronse ata os xardíns anexos á Deputación de
Lugo para a presentación ante a prensa do programa previsto para a 16ª edición
da irmandade con Guerlédan-Sarria.
A rolda de prensa
foi presentada por Sonsoles López, deputada da provincia así como membro da
Irmandade, e nela participaron Francisco Pérez, representante do Concello de
Sarria, e Elvira Vila, presidenta da asociación en Sarria.
Durante a súa
intervención, a presidenta suliñou que este ano a franxa de idade das persoas
que participan na viaxe é moi ampla: dende rapazas de secundaria ata xubilados.
Ademais, contan con xente dos principais sectores da nosa comarca: gandeiros,
agricultores e membros do sector servizos.
No que respecta
ao programa deste ano, proposto pola directiva de Mûr, quixo destacar a
variedade das actividades propostas, o que fai apetecible a excursión para
calquera. Viaxes a vilas costeiras, camiñatas, visitas ás industrias da zona,
comidas en familia, fest-noz…
Vila agradeceu
tamén as axudas que recibe a asociación por varias vías (desta volta,
principalmente da Deputación), e que fan posible que a viaxe sexa moito máis
accesible para todos: dos case 500 euros que custa a viaxe, o viaxeiro non paga
máis de 250.
Cabe salientar
tamén que tanto a deputada socialista como o concelleiro popular coincidiron en
gabar á asociación por ser quen de estar máis aló de calquera ideoloxía política,
o que garantiu a súa supervivencia durante estes 16 anos. De feito, membros das
tres principais forzas políticas participarán este ano na viaxe.
O grupo deste
ano, formado por cincuenta sarriaos, poñerá rumbo á Bretaña o próximo martes 12
de agosto.
